Interpol Tirana ka ekstraduar drejt vendit tonë tre shtetas shqiptarë për vepra të ndryshme penale, si vrasje, vjedhje e kultivim të bimëve narkotike.
Si rezultat i bashkëpunimit të Interpol Tirana me Interpol Wiesbaden, u bë i mundur arrestimi dhe ekstradimi nga Gjermania drejt vendit tonë i të dënuarit shqiptar Ilir Kapllanaj, 49 vjeç, banues në Fier.
Ky shtetas ishte i shpallur në kërkim ndërkombëtar, pasi Gjykata e Rrethit e ka dënuar me 23 vjet burg për veprën penale, “Vrasje me paramendim kryer në bashkëpunim.”
Në bashkëpunim me 3 shtetas të tjerë, në 25 Shkurt 2000, ai kanë vrarë me armë zjarri shtetasin G.L, banues në Patos.
Po si rezultat i bashkëpunimit të Interpol Tiranës me Interpol Romën, u bë i mundur arrestimi në Itali, duke u finalizuar me ekstradimin drejt vendit tonë i shtetasit G.L., 28 vjeç, banues në Tropojë.
Shtetasi G.L., ishte shpallur në kërkim ndërkombëtar pasi Gjykata e Rrethit Gjyqësor Tiranë e ka dënuar këtë shtetas me 1 vit e 4 muaj muaj burg për veprën penale “Kundërshtim i punonjësit të policisë së rendit publik, duke ushtruar dhunë fizike, kryer në bashkëpunim.”
Gjithashtu falë bashkëpunimit të Interpol Tirana me Interpol Romën, u bë i mundur arrestimi në Itali, duke u finalizuar me ekstradimin drejt vendit tonë, i shtetasit R. R., 54 vjeç, banues në Vlorë. Shtetasi R.R. ishte shpallur në kërkim ndërkombëtar nga Interpol Tirana, pasi Gjykata e Shkallës së Parë për Krimet e Rënda Tiranë, i ka vendosur masën e sigurisë arrest me burg për veprën penale “Kultivimit të bimëve narkotike” dhe anëtar i “Grupit të Strukturuar Kriminal.”
