Të dhënat zyrtare të publikuara nga Instituti i Statistikave tregojnë se Shqipëria ka regjistruar sërish një rritje të numrit të vizitorëve në muajin qershor, megjithëse me një ritëm më të ngadaltë krahasuar me vitin e kaluar.
Gjatë muajit qershor 2025, në vend kanë hyrë rreth 2 milionë shtetas, nga të cilët 1.3 milion janë të huaj. Në krahasim me të njëjtën periudhë të vitit 2024, ku u regjistruan 1.9 milion hyrje, kjo përbën një rritje vjetore prej 7.6%.
Në total, gjatë gjashtëmujorit të parë të vitit, numri i hyrjeve në Shqipëri ka arritur në 8.5 milion shtetas, nga 8 milion në të njëjtën periudhë të një viti më parë, duke shënuar një rritje prej 6.3%. Ndër ta, 4.7 milion janë vizitorë të huaj.
Megjithatë, në krahasim me vitin 2023, rritja e turistëve të huaj ka pësuar një ngadalësim. Gjatë periudhës janar-qershor 2025, fluksi i tyre është rritur me vetëm 4.8%, duke sinjalizuar një tendencë më të matur të rritjes.
Pjesa dërrmuese e turistëve të huaj vijnë nga vendet europiane, të ndjekur nga Shtetet e Bashkuara të Amerikës, Azia Lindore dhe Afrika. Turistët europianë dominojnë tregun, me mbi 4.5 milion hyrje në 6 muaj.
Çifti gjerman Henry dhe Bertha, që aktualisht po pushojnë në Himarë, thonë se kjo është vizita e tyre e parë në Shqipëri.
“Kjo është hera e parë në Shqipëri. Më herët ishim në Durrës dhe Vlorë. Himara është shumë e bukur, kemi 4 ditë këtu. Do të qëndrojmë edhe tre ditë të tjera e më pas do të shkojmë në Sarandë e më pas në Korfuz,” thotë Henry.
Ndërkohë, Bertha vlerëson pastërtinë dhe çmimet: “Plazhi është shumë i bukur. Plazhi është i pastër. Dhe udhëtuam me anije dhe pamë disa vende të çuditshme. Çmimet duken normale.”
Edhe operatorët turistikë shprehen të kënaqur me ecurinë deri më tani.
“Sezoni këtë vit është goxha pozitiv. Nuk po bëj krahasim me 2023, pasi ishte edhe më i suksesshëm. Por mendimi im është se ka nisur mirë dhe shpresojmë që të përmbyllet po kështu,” deklaron Luixhino Isufaj, sipërmarrës në sektorin e turizmit.
Ai thekson gjithashtu një element të rëndësishëm:
“Kemi një lloj diversifikimi të vendeve nga po vijnë turistë këtë vit dhe ky është një fat i madh.”
Megjithatë, pavarësisht shifrave pozitive, sfidat nuk mungojnë. Veprime si prishja e ndërtimeve pa leje në zona turistike si Thethi dhe lirimi i hapësirave publike në plazhe, shoqëruar me fadroma dhe tritol, mund të ndikojnë negativisht në perceptimin e vizitorëve dhe në imazhin e përgjithshëm të vendit.
