Davide Pecorelli është ekstraduar nga Italia në Shqipëri dhe është marrë në dorëzim në aeroportin e Rinasit nga Forcat Operacionale të Drejtorisë së Përgjithshme të Burgjeve. Ai po shoqërohet drejt një institucioni penitenciar për të vuajtur dënimin e dhënë nga autoritetet shqiptare.
Sipas një vendimi të Gjykatës së Rrethit Gjyqësor Pukë, ndaj Pecorellit është vendosur masa e sigurisë “arrest në burg”, ndërsa ai akuzohet për disa vepra penale, përfshirë “Mashtrimin”, “Dhunimin e varreve”, “Shkatërrimin e pronës me zjarr” dhe “Kalimin e paligjshëm të kufirit shtetëror”.
Gjykata e Shkodrës e ka dënuar me 4 vite burg, pasi sipërmarrësi italian 47-vjeçar inskenoi vdekjen e tij në janar të vitit 2021 në zonën e Pukës, duke lënë të digjej një automjet me një trup të karbonizuar brenda. Më pas, ai rezultoi gjallë dhe u shfaq në Itali, duke u bërë objekt hetimi dhe ndjekjeje penale.
Përveç inskenimit të vdekjes, Pecorelli akuzohet gjithashtu për hyrje të paligjshme në territorin shqiptar si emigrant ilegal dhe për veprime që kanë penguar zbardhjen e të vërtetës nga autoritetet.
