Superstrada Durrës-Kavajë-Rrogozhinë e ka ndarë në mes dhe e ka lanë pa lidhje të shpejta hyrëse dhe dalëse të gjithë komunën e Golemit.
Kjo zonë e mbushur me ndërtime kaotike në 25 vitet e fundit, tashmë prej disa vitesh ka pasur probleme serioze edhe me infrastrukturën si në zonën e plazhit, ashtu dhe në zonat kodrinore ku shtrihet edhe komuna e Golemit.
Fondi Shqiptar i Zhvillimit ka parashikuar të ndërhyrje sërish në këtë zonë, në një fazë të dytë duke synuar kryesisht infrastrukturën, por pa anashkaluar shëtitoret, parqet apo parkimet.
Në një procedurë të hapur së fundmi FSHZH vendosi një fond limit mbi 835 milionë lekë apo rreth 6.7 milionë euro, për këto ndërhyrje të cilat argumentohet se janë të nevojshme për shkak të zhvillimit dinamik të turizmit në këtë zonë të vendit.
Referuar raportit teknik të ndërhyrjeve nënvizohet se, janë të paktën 26 kilometra gjatësi rruge, ku do të ndërhyhet ndërkohë që do t’i jepet zgjidhje edhe lidhës së rrugëve dytësore tek “Mali i Robit”.
Bëhet fjalë për një kryqëzim në disnivel por ende nuk është përcaktuar nëse do të jetë mbikalim apo nënkalim.
Objektivat kryesorë të këtij projekti sipas FSHZH, do të jenë: Përmirësimi i aksesit drejt potencialeve turistike të zonës, me qëllim zhvillimin e turizmit, rritja e cilësisë së jetës për komunitetin dhe pushuesit, rritja e mundësive për zhvillimin ekonomik të qëndrueshëm të zonës turistike, përmirësimi dhe siguria e lëvizjes së mjeteve dhe njerëzve brenda zonës turistike si dhe përmirësimi dhe lehtësimi i qarkullimit të mjeteve të transportit nga zona turistike në drejtim të Kavajës, të Durrësit dhe të Tiranës.
“Për të arritur objektivat e mësipërm, referuar Termave të Referencës Konsulenti do të trajtojë rreth 26 km rrugë, kanale ose shëtitore, kryesisht në gjurmë ekzistuese. Gjithashtu do të parashikohet një kryqëzim në disnivel (me nënkalim ose mbikalim), i cili do të vendoset midis rrethrotullimit të plepave dhe Malit të Robit dhe duhet të lidhë rrugët dytësore me njëra tjetrën”,- thuhet në dokument.
I njëjti raport saktëson se, vendndodhja e projektit kufizohet: Në Veri: me kufirin ndarës të Njësisë Administrative Rrashbull, Bashkia Durrës, pranë Shkëmbit të Kavajës.
Në Lindje: me superstradën Durrës-Rrogozhinë; Në Perëndim: me vijën bregdetare; Në Jug: me Përroin e Lishatit, Qerret, Nj. Administrimi Golem, bashkia Kavajë.
“Pjesë e këtij projekti konsiderohet edhe segmenti i rrugës dytësore Rrethrotullimi Plepa Rrethrotullimi Mali i Robit i emërtuar më poshtë si segmenti 0-1-2, si dhe segmenti i rrugës dytësore Rrethrotullimi Plepa–Nënkalimi Golem i emërtuar më poshtë si segmenti 0-4-3.
Pas diskutimeve me autoritetin kontraktues ne fazën e parë do të ndërtohen akset e mëposhtme: Segmenti 1/3 – 3. Rruga bashkë me rehabilitimin e përroit të Agait. (0.4 km) Segmenti 5 – 6 (1.6 km) Segmenti 9 – 10 (0.6 km) Segmenti 3 -5 – 13/1 (0.6 km) Kanal kullues Segmenti 1/5 – 5/9 (0.3 km) Segmenti 1/9 – 5/4 (0.3 km)” sqaron FSHZH.
/GazetaReforma.com/
