Një klasë në gjimnazin e Këlcyrës “Sejfulla Malëshova” është mbyllur për shkak të infektimit me COVID të disa nxënësve. Bëhet me dije se janë 20 nxënës të klasës së II të këtij gjimnazi që kanë rezultuar pozitivë me COVID.
Mbyllja e klasës u bë me urdhër të ISHP për të këputur zinxhirin e infeksionit në mënyrë që të mos infektohen nxënës të tjerë. Mësimi do të rifillojë pas 14 ditësh
Ndërkohë mbrëmjen e djeshme gjimnazi “Qazim Pali” në Borsh të Himarës u mbyll për 10 ditë, pasi 7 mësues dhe 6 nxënës rezultuan pozitivë me COVID-19.Gjithashtu ditën e djeshme një 3 vjeçare humbi jetën në spitaline Beratit për shkak tëkomplikacioneve të Covid-19 dhe 2 fëmijë të tjerë u nisën në gjendje të rënduar nga Berati drejt spitalit Infektiv Tiranë.
Kujtojmë ministrja e Shëndetësisë Ogerta Manastirliu ka paralajmëruar se me lokalet dhe restorantet në vend mund të veprohet njësoj si me universitetet përsa i përket pasaportës së Covid.
Nga foltorja e Parlamentit, ministrja Manastirliu shtroi në formë pyetje drejtuar deputetëve të opozitës nëse duhet aplikuar edhe në Shqipëri e njëjta formulë si në vendet e Bashkimit Europian, ku për të hyrë në lokale, restorante dhe institucione duhet që qytetarët të jenë të pajisur me Green Pass (pasaporta e vaksinës Covid).
“Mos harrojmë që kur krahasohemi me Europën dhe dalim këtu dhe flasim për klasifikime, duhet të përmendim kontekstin. Si hyhet në një lokal, në një bar, në një restorant në Europë? A hyhet me Green Pass? Do ta vëmë Green Pass-in? Si shkohet në strukturat e tjera të shërbimit? Do ta vëmë Green Pass-in. E vendosëm në universitete”, deklaroi ministrja e Shëndetësisë Ogerta Manastirliu.
