Kreu i Partisë Demokratike, Lulzim Basha ka reaguar në lidhje me incidentin që ndodhi sotme gjatë aksionit të policisë, me gazetarin e News 24, Ergys Gjençaj.
Basha thotë se dhunimi i Gjençajt është një akt i turpshëm që duhet dënuar me forcë nga të gjithë. Kryedemokrati shprehet se represioni dhe dhuna ndaj gazetarëve është product i modelit Rama që kërkon të zhbëjë të vërtetën me propagandë e dhunë.
“Dhunimi i reporterit Ergys Gjençaj është një akt i turpshëm që duhet dënuar me forcë nga të gjithë. Brutaliteti ndaj gazetarit në detyrë duhet hetuar dhe personat përgjegjës duhet të mbajnë përgjegjësi para ligjit. Represioni dhe dhuna ndaj gazetarëve është produkt i modelit Rama që kërkon të zhbëjë të vërtetën me propagandë, korrupsion dhe dhunë. Kjo konfirmohet edhe nga raporti i fundit i OSBE/ODIHR. Dhuna ndaj gazetarëve dhe lirisë së mediave është dhunë ndaj demokracisë dhe lirive të çdo qytetari”, ka thënë Basha.
Incidenti me gazetarin Ergys Gjençaj ndodhi ditën e sotme gjatë një aksioni anti-drogë të policisë. Gazetari po filmonte gjithë ngjarjen kur efektivët e policisë i afrohen një makine për kontroll, ndërsa personat që ishin në makinë ia dalin që t’i largohen për një kohë të shkurtër. Më vonë u njoftua arrestimi i tyre, ndërsa u bë me dije se ishin sekuestruar gjithashtu 1 kilogramë e 128 gramë lëndë narkotike e dyshuar kokainë.
