Një incident i dhunshëm është shënuar mbrëmjen e së shtunës në qytetin e Bilishtit, ku është përfshirë deputeti dhe kandidati i Partisë Demokratike në qarkun e Korçës, Bledjon Nallbati, së bashku me vëllain e tij, Alti Nallbati, i njohur me nofkën “Duçja”.
Ngjarja ndodhi pranë një kryqëzimi, ku makina me të cilën udhëtonin vëllezërit Nallbati u përplas me një drejtues kamioni, për shkak të një parakalimi.
Debati fillestar mes tyre u përshkallëzua në përplasje fizike, duke kulmuar me një moment të regjistruar nga kamerat e sigurisë, ku Nallbati shihet duke u ngjitur mbi kabinën e kamionit me qëllim që të godasë drejtuesin. Ai u tërhoq nga kalimtarët që ndodheshin pranë vendngjarjes.
Pas ngjarjes, të tre personat e përfshirë deputeti, vëllai i tij dhe shoferi i kamionit u shoqëruan në ambientet e komisariatit të Devollit për të dhënë deklarimet përkatëse.
Më pas, ata janë lënë të lirë. Sipas burimeve, shoferi i kamionit ishte në tranzit nga pika kufitare e Kapshticës drejt zonës së Devollit.
