Në Gjykatën e Posaçme Antikorrupsion ka nisur seanca e parë ndaj ish-deputetit socialist Alqi Bllako, i akuzuar për “korrupsion pasiv” në kuadër të hetimeve për inceneratorin e Tiranës.
Sipas hetimeve, Bllako dyshohet se ka përfituar 120 mijë euro në cilësinë e sekretarit të Ministrisë së Mjedisit për favorizimin e Klodian Zotos dhe Mirel Mërtirit në ndërtimin e inceneratorit.
Në një tjetër rast, ai akuzohet se i ka kërkuar Zotos një rryshfet prej 7.5 milionë lekësh për punësimin fiktiv të Vladimir Bezhanit në shoqërinë “Integrated Technology Services”.
Në prill 2024, SPAK çoi për gjykim një pjesë të të akuzuarve për inceneratorin e Tiranës, përfshirë ish-ministrin Lefter Koka dhe disa ish-zyrtarë të bashkisë së Tiranës.
Bllako është dënuar më parë me 2.8 vite burg për aferën e inceneratorit të Fierit dhe ka marrë një tjetër dënim me 2.8 vite burg për inceneratorin e Elbasanit, si dhe pesë vite heqje të së drejtës për të ushtruar funksione publike për falsifikimin e dokumenteve për shpronësimin e një toke në bashkëpunim me Koka dhe Pëllumb Abeshin.
