Këtë të hënë është zhvilluar seanca gjyqësore në lidhje me çështjen e inceneratorit të Tiranës, ku në bankën e të akuzuarve ndodhen tetë ish-zyrtarë, përfshirë ish-ministrin Lefter Koka dhe ish-drejtorin Taulant Tusha.
Të gjithë të pandehurit akuzohen për shpërdorim detyre dhe kanë kërkuar pafajësinë përballë Gjykatës së Posaçme.
Pas paraqitjes së mbrojtjes nga avokatët, GJKKO bëri të ditur se vendimi për këtë çështje do të shpallet më 16 prill, në orën 13:00.
Ndërkohë, avokati Ermir Beta, përfaqësuesi ligjor i Namik Simixhiut një nga anëtarët e komisionit të vlerësimit të ofertave kërkoi gjithashtu pafajësi për klientin e tij. Ai theksoi gjendjen e rëndë shëndetësore të Simixhiut, i cili sipas tij është 68 vjeç, ka vetëm një veshkë dhe vuan nga disa sëmundje kronike.
“Është mbajtur në burg për dy vite, pavarësisht gjendjes së tij. Pretenca e prokurorisë është paradoksale, pasi kërkon të njëjtin dënim për një ish-ministër dhe për një specialist në fund të zinxhirit”, deklaroi avokati gjatë seancës.
SPAK ka kërkuar në total 26 vite burg për të tetë të pandehurit, ndërsa pritet që më 16 prill drejtësia të japë fjalën e saj për një nga çështjet më të diskutuara të viteve të fundit.
