Ish-ministri i Mjedisit Lefter Koka, i akuzuar për korrupsion lidhur me çështjen e inceneratorëve, është lënë në burg nga Gjykata e posaçme Kundër Krimit të Organizuar dhe Korrupsionit.
Kujtojmë që akuzat që rëndojnë mbi Kokën janë shpërdorim detyre, pastrim parash dhe korrupsion.
Ndërkohë të akuzuar për këtë dosje dhe të shpallur në kërkim janë edhe dy biznesmenët Stela Gugallja dhe Klodian Zoto, ndaj të cilëve ka masë sigurie arrest në burg në mungesë. Ata akuzohen se kanë lëshuar fatura fiktive me vlerë 3.6 milionë Euro për punime që nuk janë kryer asnjëherë në incenerator.
Avokati mbrojtës i ish-ministrit, Fatmir Braka, tha se Lefter Koka është shprehur i pafajshëm në seancën gjyqësore. Madje arrestimin e klientit të tij e konsideron të befasishëm pasi nuk është marrë asnjëherë në pyetje. Ai theksoi se do ta apelojnë masën e sigurisë.
“Lefter Koka mbajti atë qëndrim që i përgjigjet të vërtetës, që është krejtësisht i pafajshëm. Konfirmoi dhe njëherë që nuk ka asnjë përgjegjësi në lidhje me procedurat për impiantin. Nuk u fol për përgjegjësi të të tjerëve. Ai thotë që në gjithë këtë proces të impiantit të Elbasanit nuk ka përgjegjësi asnjë, ai nuk aludon dhe as mendon që ka përgjegjësi ndonjë tjetër. Ai akuzohet për shpërdorim detyre kur gjithë procedura që ai paraqiti është që ai nuk ka asnjë përgjegjësi.
