Kreu i Partisë Demokratike, Lulzim Basha, i ka bërë thirrje prokurorëve të SPAK, që të nisin hetimet sa më parë në lidhje me aferën korruptive të inceneratorëve. Në të kundërt sipas bashës, nëqoftëse nuk do të ketë asnjë iniciativë në lidhje me këtë aferë, atëherë këta prokurorë të japin dorëheqjen.
“Anëtarët e SPAK të nisin hetimet për aferën 400 milionë ose të japin dorëheqjen. Çfarë presin? Të marrin njerëzit fatin e tyre në dorë? Sot duhet të dalin edhe t’i thonë shqiptarëve a kanë filluar apo jo hetimin. Ky krim i rëndë duhet të ishte hetuar. Ndërkohë vazhdon vjedhja. Javën e kaluar u paguan 2 milionë Euro dhe s’lëviz gishtin asnjë prokuror. Ky është një krim i rëndë kundër shqiptarëve. I bëj dhe njëherë thirrje SPAK të nis urgjentisht hetimet. Dhe të njoftojnë publikisht ku janë me hetimet. Faktet janë ashiqare para syve të të gjithëve”, ka thënë kryedemokrati Basha në konferencën për gazetarët.
Ndër të tjera Basha tha se PD kur të vijë në qeveri do krijojë një strukturë të posaçme të quajtur “gjurmo paranë”, e cila do të gjejë ku janë fshehur paratë për vjedhjen me inceneratorët.
