Arqipeshkvi Tiranë-Durrësit, njëkohësisht Presidenti i Konferencës Ipeshkvore të Shqipërisë, George Frendo është infektuar me koronavirus.
Ky lajm është bërë i ditur nga zyra e shtypit e cila njofton se Frendo për disa ditë ka qenë nën monitorimin e mjekëve për shkak të infektimit. Por mbrëmjen e sotme mjekët rekomanduan që të transportohet për në spital për mjekim më të specializuar për shkak të komplikacioneve respiratore.
Njoftimi nga KISH
“Ju njoftojmë se SH.T. Imzot George Frendo O.P., Arqipeshkëvi i Tiranë-Durrësit e njekohësisht Presidenti i Konferences Ipeshkvore të Shqipërisë, ka qenë për disa ditë në monitorim mjekësor për shkak se ka rezultuar pozitiv me Covid 19.
Me rakomandimin e mjekëve, në mbrëmjen e ditës së sotshme, është vendosur që Imzot Frendo të shtrohet në Spital, për shkak të disa komplikacioneve respiratore gjatë ditës. Ju kërkojmë lutjet tuaja për Imzot Frendon dhe i urojmë atij shërim sa më të shpejtë”.
Ndërkohë dje u mësua se dhe kryepeshkopi Anastas Janullatos ishte prekur nga koronavirusi, ndërsa për shkak të moshës ai u transferua me një avion drejt një klinike të specializuar në Athinë.
