Ditën e djeshme u njoftua se Arqipeshkvi Tiranë-Durrësit, njëkohësisht Presidenti i Konferencës Ipeshkvore të Shqipërisë, George Frendo ishte infektuar me koronavirus dhe ishte shtruar në spital.
Por në një njoftim tjetër nga zyra e shtypit u njoftua se mbrëmë ka udhëtuar drejt Italisë për t’u shtruar në Spitalin Miuli të “Acquaviva delle Fonti” në Bari.
Ndërkohë para dy ditësh u mësua se dhe kryepeshkopi Anastas Janullatos ishte prekur nga koronavirusi, ndërsa për shkak të moshës ai u transferua me një avion drejt një klinike të specializuar në Athinë.
“Ju njoftojmë se SH.T. Imzot George Frendo O.P., Arqipeshkëvi i Tiranë-Durrësit dhe njëkohësisht Presidenti i Konferences Ipeshkvore të Shqipërisë, mbrëmë ka udhëtuar drejt Barit, për t’u shtruar në Spitalin Miuli të “Acquaviva delle Fonti”.
Shpresojmë se gjatë ditës do të kemi lajme më të hollësishme.
Ndërkohë vazhdojmë të kërkojmë, në lutjet tona, shërimin e tij dhe shërimin e të gjithë të sëmurëve të prekur nga kjo Pandemi”, thuhet në njoftim.
