Imelda Shkëmbi, bashkëshortja e trajnerit dhe ish-futbollistit Bledi Shkëmbi, e cila u plagos një vit më parë në zonën e ish-Parkut të Autobusëve në Tiranë, pasi mbi kokë i ranë skelat metalike të një pallati në ndërtim, kërkon dëmshpërblim në masën e 100 milionë lekëve të vjetra.
Në të njëjtin incident u plagos edhe babai i saj, Hysen Lavdari, 70 vjeç. Të dy pësuan dëmtime serioze dhe qëndruan për javë të tëra në spital, nën kujdes intensiv mjekësor.
Objekti ku ndodhi ngjarja është në pronësi të kompanisë ndërtuese “Arlis Construction”, e administruar nga biznesmeni Armand Lilo, i njohur edhe si pronar i kullës “Eyes of Tirana”. Në padinë e saj, Shkëmbi kërkon jo vetëm kompensim financiar për dëmin fizik dhe moral të shkaktuar, por edhe vendosjen e masës së sigurimit ndaj pasurive të kompanisë ndërtuese.
Çështja është regjistruar më 6 maj dhe do të shqyrtohet nga gjyqtarja Ina Hoxhaj. Sipas kërkesë-padisë, kërkohet:
-Detyrimi i kompanisë ndërtuese për dëmshpërblim pasuror dhe jopasuror në shumën 10 milionë lekë.
-Vendosja e sekuestros konservative mbi llogaritë bankare dhe pasuritë e kompanisë.
-Lejimi i ekzekutimit të përkohshëm të vendimit gjyqësor.
-Detyrimi i palës së paditur të mbulojë shpenzimet gjyqësore.
Tashmë, përgjegjësia e “Arlis Construction” dhe vetë pronarit të saj pritet të shqyrtohet në sallën e gjyqit.
