Mbrëmjen e djeshme një ngjarje e rëndë ka ndodhur në Komisariatin nr.3 në Tiranë, ku një efektiv policia ka vrarë me armë zjarri kolegun e tij.
Ludian Zaimi ka qëlluar 7 herë mbi kolegun e tij Çaush Saliasi 55-vjeç, i cili ndërroi jetë në spital. Bëhet e ditur se konflikti midis tyre ka nisur për motive banale.
Theksojmë se Zaimi kishte vetëm 1 vit e gjysmë që ishte bërë pjesë e forcave të policisë, ndërkohë që viktima kishte mbi 20 vite që shërbente për uniformat blu. Në deklaratën e tij pas ngajrjes, autori i vrasjes shprehet se kolegu i tij e kishte bullizuar dhe talluar përgjatë gjithë kohës dhe kishte gjera të akumuluara me të. Për të hetuar këtë ngjarje menjëherë është ngritur një grup pune nga ana e Autoritetit të Mbikëqyrjes Policore.
Në ambientet e Komisariatit nr. 3 gjithashtu ka shkuar një grup i posaçëm nga Drejtoria e Përgjithshme e Policisë së Shtetit, përfshirë ekspertë të Drejtorisë së Standardeve Profesionale dhe nga Departamenti i Rendit dhe Sigurisë Publike.
“Më datë 23.05.2022, rreth orës 21:20, në rrugën “Mine Peza”, në ambientet e Komisariatit të Policisë Nr. 3, në rrethana ende të paqarta, punonjësi i Policisë, shtetasi L.Z., ka plagosur me armë zjarri shtetasin Ç.S., të dy me detyrë oficerë të Patrullës së Përgjithshme. Si pasojë e plagëve të marra, punonjësi i Policisë Ç.S. ka ndërruar jetë në spital. Autori i dyshuar është ndaluar dhe po kryhen të gjitha veprimet hetimore për zbardhjen e rrethanave të ngjarjes”, sipas policisë.
Kjo ngjarje është si një goditje e drejtpërdrejtë ndaj imazhit të policisë së shtetit, të cilët në vend që të ruajnë rendin dhe sigurinë, krijonë të tilla precedentë në institucionin ku ushtrojnë veprimtarinë e tyre.
