Presidentja e Kosovës, Vjosa Osmani ka konfirmuar edhe një herë gatishmërinë për të ndihmuar miqtë dhe partnerët në përballje me zjarret. Në një postim në Twitter, Osmani shkruan se imazhet nga Shqipëria, Maqedonia dhe Greqia janë zemërthyese. Osmani thotë se trupat e FSK dhe zjarrfikësit ishin dje në shqipëri për të ndihmuar në luftën me zjarret.
Postimi i plotë:
Ndërsa zjarret e egra vazhdojnë të përhapen në të gjithë rajonin, imazhet nga Shqipëria, Maqedonia, Greqia janë zemërthyese. Natën e kaluar trupat tanë të FSK-së dhe zjarrfikësit janë vendosur në Shqipëri për të ndihmuar në luftën me zjarret. Mendimet tona janë me të gjithë ata që janë prekur. Kosova qëndron gati për të ndihmuar miqtë dhe partnerët tanë.
Disa prej vendeve të Rajonit, si Greqia, Maqedonia e Veriut dhe vendi ynë janë përfshirë prej ditësh nga zjarret që kanë shkaktuar dëme të konsiderueshme. Evia dhe Atika në Greqi kanë qenë zonat më të prekura, ndërsa ditën e djeshme qeveria miratoi një fond 500 milionë euro për rikuperimin nga zjarret.
Ndërkohë, ditën e djeshme në Shqipëri u desh ndihma e Forcave të Sigurisë së Kosovës për shuarjen e zjarreve që u përhapën me shpejtësi në Tunelin e Kalimashit, të favorizuara edhe nga era e terreni.
