Deputetja demokrate Flutura Açka ka reaguar ashpër në rrjete sociale ndaj deklaratave të Ilir Metës mbi kreun e SPAK, duke shprehur pakënaqësinë e saj për mungesën e ndëshkimeve ndaj sjelljeve të pahijshme të ish-Presidentit’: “Vetëm në çmendinën tonë mund të ndodhë që ish-Presidenti i Republikës fyen rëndë publikisht Kryetarin e SPAK-ut dhe asgjë nuk mund të ndodhë.” Duke komentuar mbi situatën aktuale, Açka shton se, “Në një vend normal sot njëri prej tyre duhej të reagonte. Ose njëri të jepte dorëheqjen, ose tjetri të paditej në gjykatë.”
Gjatë një diskutimi në parlament, ku ish-Presidenti u përshkrua në mënyrë humoristike se “Iliri nuk është mirë nga fiqiri”, Açka përdori këtë rast për të theksuar seriozitetin e situatës: “Por, në këtë rast Iliri nuk është çështje fiqiri, por lajthitje politike harakiri.” Duke mbyllur, ajo thekson se privilegjet e tepruara të zyrtarëve shtetërorë janë një shqetësim i madh, duke shtuar se “Të shohësh shtetarët e tu që kanë pasur – dhe kanë – të gjitha privilegjet e mundshme me kushtetutë e pa kushtetutë, në këtë katandi, është keqardhje shumë e madhe.”
