Kryetari i Partisë së Lirisë, Ilir Meta nuk ndal sulmet e tij ndaj Kreut të SPAK, Altin Dumani. Meta tha sot, gjatë një bashkëbisedimi me gazetarët nga selia e partisë, duke iu referuar hetimit ndaj ish Kryeministrit Sali Berisha, se kreu i Prokurorisë së Posaçme Antikorrupsion, është një rreshter i Rilindjes.
Sipas tij, ai e ka kthyer SPAK-un në një organizatë kriminale.
“Është një rreshter i rilindjes që e ka kthyer me drejtimin e tij skapin në organizatë kriminale që mbron pandëshkueshmërinë e Edi Ramës dhe Veliajt, që nuk do preken për momentin, por do u vijë radha. Sikurse u ka ardhur radha shumë ministrave që patën për garanci besën e Edi Ramës. Po kështu e ka përdorur dhe përdor institucionin e tij për të marrë peng njerëz brenda opozitës dhe partive të opozitës, për të bërë diversion, për të krijuar forca të reja politike, në mënyrë që të lehtësojë sa të mundet regjimin e kalbur të Edi Ramës, të kalojë edhe ca kohë. Por, nuk do të ketë asnjë sukses”, tha Meta.
Meta u ndal edhe tek gjendja ekonomike dhe vështirësitë e popullit shqiptarë, duke u shprehur se Shqipëria ka treguesin më të lartë të shlyrjes së borxhit.
“Shqipëria ka treguesin më të lartë të shlyrjes së borxhit me eksportet e mallrave për arsye të nivelit shumë të ulët të eksporteve krahasuar me vendet e rajonit. Shqipërisë i duhen të ardhurat publike të 2.2 viteve fiskale për të shlyer borxhin, ndërkohë Kosovës i duhet 0,6 vit fiskal, Bosnjë-Hercegovinës 0.7 vit fiskal, Serbisë 1.1 vite, Malit të Zi 1.5 dhe Maqedonisë së Veriut i duhen të ardhurat publike të 1.7 viti fiskal për të shlyer borxhin”, tha ai.
Kjo nuk është hera e parë që kreu i Partisë së Lirisë, Ilir Meta lëshon deklarata të tilla ndaj kreut të SPAK, Altin Dumani. Më herët, Meta ka deklaruar se Altin Dumani është takuar me Charls McGonigal.
