Vitin e shkuar, Teatri Kombëtar u shemb dhe kjo ngjarje, shktaktoi shumë polemika dhe trazira, ku protesta të shumta u zhvilluan. Kur ka kaluar thuajse një vit nga kjo ngjarje, presidenti i Shqipërisë, Ilir Meta, ka dhënë një mesazh për Ditën Botërore të Teatrit, teksa e ka kujtuar dhe një herë shembjen e Teatrit Kombëtar. Në një postim në rrjetet sociale, Meta thotë se krimi që ndodhi mëngjesin e 17 majit të 2020 në zemër të Tiranës nuk do të amnistohet, madje do të vendoset drejtësia. Ai thotë se pas 25 prillit Teatri Kombëtar do të ndërtohet aty ku ishte, ashtu siç ishte.
Postimi i Ilir Metës:
“Sot, me rastin e Ditës Botërore të Teatrit, zotohem se krimi i ndodhur në zemër të Tiranës më 17 maj 2020, mes errësirës dhe në periudhë pandemie, nuk do të amnistohet kurrë dhe se mbi rrënojat e Teatrit Kombëtar, do të rivendoset njëherë e përgjithmonë Drejtësia, që do të shembë Tiraninë.
Mirënjohje të gjithë artistëve dhe qytetarëve, të cilët për mbi dy vjet, me sakrifica dhe nën presione të pashembullta, i dhanë zë kauzës së Teatrit dhe zgjuan ndërgjegjen shoqërore e kombëtare. Pas 25 prillit, Teatri Kombëtar do ndërtohet aty ku ishte dhe ashtu siç ishte!
KOHA PËR DREJTËSI PO AFRON!”
