Presidenti Ilir Meta ka qenë ditën e sotme në qytetin e Durrësit, ku ka dhënë edhe një deklaratë para mediave.
Meta është shprehur se më shumë i shqetësuar është për “artistët politikë” sesa për Teatrin Kombëtar. Ai ka bërë një thirrje për Bashën, Ramën por edhe për Kryemadhin që të mundësojnë hapjen e negociatave në muajin tetor dhe të zgjidhin krizën.
“Besoj jam shprehur qartë dhe në mënyrë të vazhdueshme edhe për padinë ndaj ligjit për Teatrin Kombëtar në Gjykatën Kushtetuese. Por ajo çfarë na shqetëson më shumë është ky teatri politik absurd i cili kërcënon që Shqipëria të ketë mundësi të çel negociatat në tetor.
Prandaj iu bëj thirjrje të veçantë 3 artistëve që të marrin të gjitha masat, sepse qytetarët kanë nevojë të kenë qetësi, normalitet dhe qeverisje vendore të ligjshme që jep llogaridhënie për të gjitha shqetësimet e tyre.
Zgjedhjet vendore të 13 tetorit nuk është se zgjidhin gjithçka por është një mënyrë ligjore dhe kushtetuese dhe është përgjegjësi e kryeministrit për t’i pranuar dhe punuar për zhvillimin e tyre,” është shprehur presidenti Meta.
Presidenti ka shtuar se sot kemi një parlament që nuk po jep më llogari para askujt, kemi një shumicë që po kontrollon gjithçka, ku situata është kaotike në të gjitha drejtimet.
Sipas Metës, opozita ka pasur shumë herë mundësinë për të parandaluar shumë nga marrëzitë e kapjes së institucioneve, ndaj edhe nuk duhet të shfajësohet.
Opozita ka pasur mundësinë e padiskutueshme për të bërë propozime me këmbë në tokë për të mos arritur në këtë pikë. Por nga ana tjetër, dy rrugë nuk mund të ndiqen, deligjitiimimi i institucioneve dhe kapja e tyre”, tha Meta.
