Kryeopozitari Lulzim Basha është pritur në takim nga presidenti Ilir Meta ku kanë diskutuar marrëveshjen e 5 qershorit dhe diskutimet në Këshillin Politik.
“E sigurova se do të dekretoj menjëherë ndryshimet e Kodit Zgjedhor në respekt të Marrëveshjes konsensuale të 5 qershorit”, shkruan Meta.
Meta këshillon Bashën që të vijojë punën në Këshillin Politik dhe të tregojë kujdes për të mos rënë pre e asnjë provokimi.
“E falenderova për kontributin konstruktiv në arritjen e Marrëveshjes së 5 qershorit dhe i kërkova të vazhdojnë punën në Këshillin Politik në frymën e konsensusit duke mos rënë pre e asnjë provokimi. Inkurajova vijimin e bashkëpunimit të ngushtë me të gjithë partnerët e investuar për çeljen sa më parë të negociatave të anëtarësimit të Shqipërisë me Bashkimin Europian dhe që kanë mbështetur Këshillin Politik në frymën e konsensusit dhe gjithëpërfshirjes”, shkruan kreu i shtetit.
Mazhoranca socialiste kërkon të miratojë më 30 korrik ndryshimet kushtetuese për hapjen e listave dhe heqjen e koalicioneve parazgjedhore, por kjo po kundërshtohet nga opozita e bashkuar dhe nga presidenti.
