Aksioni për prishjen e ndërtimeve pa leje në zonën turistike të Thethit ka shkaktuar tension dhe kundërshtim të fortë nga banorët vendas.
Ditën e sotme, IKMT shembi një ndërtesë dykatëshe që ishte ende në fazë ndërtimi, me arsyetimin se objekti ishte ngritur pa leje dhe në shkelje të normave mjedisore.
Në shenjë proteste, banorët bllokuan urën e vetme hyrëse në fshat, duke ndaluar qarkullimin dhe hyrjen e forcave të Policisë së Shtetit. Ata e konsiderojnë ndërhyrjen të padrejtë dhe të dëmshme për komunitetin lokal, i cili mbështet jetesën kryesisht tek të ardhurat nga turizmi.
Gjatë protestës, tensionet u rritën mes banorëve dhe forcave të rendit. Protestuesit theksuan se po iu shkatërrohej e ardhmja, ndërsa autoritetet nuk kanë ofruar asnjë zgjidhje alternative.
Një prej banorëve, me lot në sy, tregoi se kishte investuar gjithë kursimet dhe kishte hyrë në borxhe për të ndërtuar një bujtinë tradicionale, të ndërtuar vetëm me dru dhe pa beton, në pronën e trashëguar nga familja.
“Na kanë thënë vetë të investojmë, tani po na i shembin. Kam kërkuar leje, por më thanë të pres. Shtëpia është në tokën time, çfarë të bëj tjetër? Tani më ka mbetur vetëm të vdes,” tha ai me dëshpërim.
Banorët kërkojnë që shembjet të shtyhen deri në fund të sezonit turistik dhe të hapet një dialog me qeverinë, por kërkesat e tyre nuk janë marrë parasysh, ndërsa IKMT vijon me aksionin për prishjen e 40 objekteve të planifikuara. Deri tani janë shembur 6 struktura, ndërsa 12 kabina u hoqën të hënën.
Ndërkohë, edhe pse qeveria ka promovuar satelitët “Albania 1” dhe “Albania 2” si mjete për monitorimin në kohë reale të territorit, IKMT ka pranuar se nuk po i përdor të dhënat satelitore për evidentimin e ndërtimeve pa leje.
E njëjta situatë është edhe në Policinë e Shtetit dhe institucionet e tjera që duhej të përfitonin nga kjo teknologji.
Megjithëse janë investuar rreth 6 milionë dollarë për këtë sistem, rezultatet konkrete mungojnë. Deri më tani, përdorimi i satelitëve është kufizuar në numërimin e serave bujqësore dhe disa ndërhyrje në raste emergjente, ndërsa roli i tyre në luftën kundër ndërtimeve pa leje mbetet kryesisht simbolik.
