Një ngjarje e rëndë ka ndodhur mbrëmjen e djeshme në Meinestraße në rrethin Wolfsburg Vorsfelde të Gjermanisë.
Një atentat është bërë ndaj dy të rinjve shqiptarë, të cilët ishin edhe kushërinj bashkë. Një 19-vjeçar nga Mati mbeti i pajetë, ndërsa i riu tjetër është në gjendje kritike për jetën.
Sipas medias gjermane “Bild”, 19-vjeçari Keidi Pasha u qëllua nga 6 plumba nga disa persona që ishin në një automjet në lëvizje. Menjëherë pas atentatit shqiptarët janë transportuar në spital. Njeri prej tyre për shkak të plagëve të marra ndërroi jetë, ndërsa tjetri vijon të marrë ende ndihmën e mjekëve.
Sipas disa dëshmitarëve, dy shqiptarët kanë qenë duke ecur në trotuar, ndërkohë që u qëlluan nga disa persona të maskuar.
Keidi Pasha, 19 vjeç nga Burreli, u ekzekutua teksa po shëtiste në qytet me kushëririn e tij, nga një makinë në ecje.
Pista e parë ku po dyshon policia gjermane është ajo e hakmarrjes, por nuk përjashtohet edhe ajo e përfshirjen në shitje dhe trafik droge.
Miqtë e ngushtë të Keidit kanë shprehur ngushëllimet për të riun i cili u nda nga jeta në lule të rinisë. Ngushëllimet e tyre janë shprehur përmes postimeve në rrjetet sociale.
