Igli Tare është zyrtarisht drejtori i ri sportiv i Milanit, pas prezantimit që klubi kuqezi bëri pasditen e së hënës, më 26 maj.
Mediet italiane raportojnë se Tare ka firmosur një kontratë dyvjeçare, me një pagë prej 800 mijë eurosh në vit dhe me opsion për zgjatje edhe për një sezon tjetër.
I lindur në Vlorë më 25 korrik 1973, Tare ka një karrierë të gjatë si futbollist në Itali, ku ka luajtur për Brescian, Bolognan dhe Lazion.
Pas tërheqjes nga fusha, ai ndërtoi një profil të fortë si drejtues, duke qenë drejtor sportiv i Lazios për më shumë se 15 vite, nga viti 2008 deri në 2023. Gjatë kësaj periudhe, ai kontribuoi në fitimin e tre Kupave të Italisë dhe tre Superkupave.
Në deklaratën e tij për faqen zyrtare të Milanit, Tare u shpreh:
“Është një krenari dhe përgjegjësi e madhe të jem pjesë e një klubi si Milani. Falenderoj drejtuesit që më besuan këtë rol. Ata njohin vendosmërinë dhe dëshirën time për sukses. Do të jap maksimumin e përvojës sime për t’i shërbyer këtij klubi të madh, i cili synon të rikthehet në majat e futbollit italian dhe europian.”
Ndërkohë, drejtori ekzekutiv i Milanit, Giorgio Furlani, theksoi:
“Jemi të lumtur të mirëpresim Igli Taren në familjen kuqezi. Ai është personi i duhur për të nisur një fazë të re ndërtimi. Kompetenca, vendosmëria dhe vlerat e tij, të kombinuara me njohjen e thellë të futbollit italian dhe një vizion ndërkombëtar, e bëjnë profilin e tij ideal për të udhëhequr projektin sportiv të Milanit.”
Klubi sqaroi gjithashtu se Tare do të raportojë drejtpërdrejt te drejtori ekzekutiv, Giorgio Furlani.
