Një zjarr i përmasave të mëdha ka përfshirë një sipërfaqe të konsiderueshme toke me bimësi dhe pemë frutore në fshatin Kryeluzaj të Kavajës, duke vënë në rrezik edhe trasenë e hekurudhës që kalon në zonë.
Ngjarja ndodhi mbrëmjen e kaluar dhe sipas autoriteteve, zjarri dyshohet se u shkaktua nga djegia e pakontrolluar e mbeturinave.
Falë ndërhyrjes së shpejtë të policisë dhe hetimeve të kryera, u bë e mundur identifikimi dhe arrestimi i autorit të dyshuar.
Në pranga ka rënë Gentian Blloshmi, 47 vjeç, banues në Kavajë, i cili sipas hetimeve paraprake kishte ndezur zjarr për të djegur mbeturina në tokën e tij, por flakët i dolën jashtë kontrollit dhe përfshinë një zonë të gjerë të mbjellë me pemë frutore.
Policia vendore njoftoi se materialet hetimore i janë referuar Prokurorisë së Juridiksionit të Përgjithshëm në Durrës, ndërkohë që vijon hetimi për të përcaktuar saktësisht shkallën e dëmit dhe rrethanat e ngjarjes.
Ndërkohë, Policia e Shtetit ka përsëritur apelin për qytetarët që të shmangin ndezjen e zjarreve në sipërfaqe të hapura për djegien e mbeturinave ose mbetjeve bujqësore, si dhe të mos hedhin cigare të ndezura pranë zonave të pyllëzuara, për të parandaluar incidente të ngjashme që rrezikojnë jetën, pronën dhe mjedisin.
