Në Bilisht është gjetur e pajetë në banesën e saj 66-vjeçarja Teuta Kaso, nëna e Rigels Kasos, i cili u vra një vit më parë. Dyshohet se ajo është vetëhelmuar, ndërsa policia ka referuar rastin në Prokurori për hetime të mëtejshme. Pritet ekspertiza mjekoligjore për të përcaktuar shkakun zyrtar të vdekjes.
Si ndodhi vrasja e Rigels Kasos?
Rigels Kaso, 42 vjeç, u dhunua rëndë dhe u gjet i shtrirë në rrugë në korrik të vitit 2024. Ai ndërroi jetë më pas në spital si pasojë e plagëve të marra.
Sipas hetimeve, ai ishte dhunuar nga Bajram Gjeleshi, pasi i kishte dërguar mesazhe bashkëjetueses së këtij të fundit në rrjetet sociale. Gjeleshi, duke përdorur profilin e partneres së tij, e ftoi Kasos për një takim pranë pallatit ku jetonte. 42-vjeçari, i bindur se do të takohej me gruan, shkoi në vendin e caktuar, por aty u përball me Gjeleshin, i cili e dhunoi brutalisht.
Ngjarja ndodhi pas mesnatës më 15 korrik dhe viktima u gjet nga kalimtarët në mëngjes, të cilët njoftuan ambulancën. Përpara incidentit, Kaso kishte qëndruar për tre ditë në Tiranë.
