Një 36-vjeçar nga fshati Taç Lart i Kolonjës, është arrestuar nga policia, pasi ishte konfliktuar për motive të dobëta me bashkëfshatarin e tij R.M.
Këtij të fundit, i kishte dëmtuar me gurë xhamat e banesës dhe më pas ishte larguar.
Ai gjithashtu kanosi me sëpatë punonjësit e policisë, të cilët ndërhynë për të shuar konfliktin.
Gjatë kontrollit në banesën e 36-vjeçarit, policia gjeti 22 kg kanabis dhe 69 fishekë luftarakë.
I riu ishte dënuar edhe në të shkuarën, për dhunë në familje.
Ndërkohë është proceduar penalisht edhe babai i tij F.A., për prodhim dhe shitje narkotikësh.
Njoftimi i policisë
Kolonjë
Falë reagimit të shpejtë të Policisë, parandalohet përshkallëzimi i mëtejshëm i një konflikti midis dy shtetasve.
Arrestohet në flagrancë njëri prej tyre, pasi kanosi me sopatë për shkak të detyrës, punonjësit e Policisë së Shtetit, të cilët ndërhynë për të neutralizuar konfliktin midis tij dhe një bashkëfshatari.
Gjatë kontrollit të banesës, iu gjetën e sekuestruan 22 kg lëndë e dyshuar narkotike kanabis, si edhe një sasi municionesh luftarake.
Nga një telefonatë është kërkuar ndihma e Policisë, pasi në fshatin Taç Lart, dy shtetas po konfliktoheshin me njëri-tjetrin.
Menjëherë në vendngjarje shkuan shërbimet e Komisariatit të Policisë Kolonjë, ku nga verifikimet e kryera rezulton se shtetasi B.A., 36 vjeç, banues në këtë fshat, për motive të dobëta, ishte konfliktuar me bashkëfshatarin e tij shtetasin R.M., 66 vjeç, të cilit, i kishte dëmtuar me gurë xhamat e banesës dhe më pas ishte larguar me shpejtësi.
Në momentin që shërbimet e Policisë janë drejtuar për tek banesa e 36-vjeçarit, ky shtetas ka bërë rezistencë duke i ka kanosur për shkak të detyrës efektivët, me një sopatë. Policia ka neutralizuar autorin dhe ka vijuar me veprimet e mëtejshme proceduriale duke ushtruar kontroll në banesat në pronësi të B.A., dhe babait të tij shtetasit F.A., 64 vjeç, ku u gjetën dhe sekuestruan në cilësinë e provës materiale:
Një sasi prej 22 kg lëndë e dyshuar narkotike kanabis, 69 copë fishekë luftarakë, si dhe 1 sopatë.
Shtetasi B.A., (i dënuar më parë për “Dhunë në familje”) u arrestua në kushtet e flagrancës, për veprat penale “Prodhimi dhe shitja e narkotikëve, kryer në bashkëpunim”, “Mbajtja pa leje dhe prodhimi i armëve dhe i municionit”, “Kanosja për shkak të detyrës”, “Shkatërrimi i pronës”, si edhe filloi procedimi penal në gjendje të lirë ndaj babait të tij shtetasit F.A, për veprën “Prodhimi dhe shitja e narkotikëve, kryer në bashkëpunim”.
Materialet në ngarkim të tyre i kaluan Prokurorisë të Rrethit Gjyqësor Korçë, për veprime të mëtejshme.
