Orges Bilbili, një nga autorët e masakrës së Lushnjes dhe pjesë e bandës së Lushnjes u arrestua mesditën e 10 prillit, në zonën e Xhamllikut.
Një efektiv i policisë pa Bilbilin duke ecur në këtë zonë dhe i është afruar duke i kërkuar kartën e identitetit, mirëpo, në këtë moment ai ka vrapuar dhe ka nxjerrë nga çanta një armë zjarri, teksa polici e ka paralajmëruar të ndalojë, por Bilbili i ka thënë se do e qëllojë nëse nuk largohet.
Efektivi ka qëlluar një herë në ajër, më pas e ka plagosur në këmbë dhe po ashtu është plagosur aksidentalisht edhe një grua.
Po të mos ishte për efektivin që rastësisht u ndesh me të, një nga personat më të rrezikshëm të botës së krimit në vendin tonë do vijonte të shëtiste i lirë në kryeqytet, siç ka bërë prej muajsh.
Dosja.al raporton se Bilbili dyshohet se ka mbi 6 muaj që fshihet në Tiranë, në apartamentin numër.21 në rrugën “Sitki Çiço”.
Kontrata e qirasë së apartamentit ku jetonte Bilbili, kishte si qiramarrëse një vajzë 21-vjeçare, me inicialet J.Xh, e marrë në pyetje tashmë për rolin e saj dhe sipas të dhënave që janë siguruar nga grupi hetimor, rezulton se është një mikeshë e afërt e familjes Rraja.
Konkretisht, e Ramazanit, nipit të Rrahman Rrajës, deputet i Partisë Socialiste.
Ramazanit u vu në qendër të mediave disa muaj më parë pasi dhunoi një grua në ambientet e QSUT dhe pas tij, një tjetër protagonist i fisit Rraja, Redjan Rraja, u arrestua për atentatin ndaj prokurorit Arjan Ndoja, ngjarje ku dyshohet se është përfshirë edhe Bilbili.
Janë një sërë ngjarjesh që sipas organeve hetimore lidhin Orges Bilbilin me të tjerë të fortë të vendit, por pritet që nga ekzaminimi i mundshëm i telefonit të dalin të tjera fakte në dritë.
