Forcat e policisë kanë arritur të kapin personin që “u arratis” gjatë aksionit të sotëm pranë Shkollës së Bashkuar në Tiranë. Mësohet se ai është kapur disa metra larg vendit të ngjarjes, ndërsa më herët ishin arrestuar edhe tre persona të tjerë.
Gjatë momentit të aksionit, policia kishte ndaluar një makinë me ngjyrë të zezë, në të cilën kishte lëndë narkotike të fshehur në kuti picash. I riu që ishte në makinë ka refuzuar të konrtrollohej, madje arriti t’i largohej policisë.
Mirëpo aksioni bëri bujë për një tjetër arsye. Duke mos arritur të kapnin personin e synuar, policia shtriu në tokë gazetarin e News 24, Ergys Gjençaj, i cili ishte duke e filmuar gjithë ngjarjen.
“Unë dola nga makina për të vijuar regjistrimin me celularë, kur disa policë më morën, më shtrinë barkas aty për të më kontrolluar, më morën celularin dhe më lanë aty të shkallët. I thashë që jam gazetar. Më pyetën ku punoj, prej sa kohësh. Më morën celularin dhe më lanë të prisja aty deri tani.
Më dhanë shpjegime, sepse sipas tyre, unë ndërhyra në aksionin e policisë. Unë nuk e di ku është ndërhyrja ime, kur isha në makinën e loguar të Neës24. Isha në largësi kur po kryhej operacioni, nuk isha afër që të kisha kontakte me forcat e policies”, tregoi gazetari.
Ndërkohë, lidhur me ngjarjen ka reaguar edhe Prokuroria e Tiranës, e cila ka thënë se është ngritur një grup hetimor për të përcaktuar ligjshmërinë e veprimeve të efektivëve të policisë.
Unioni i Gazetarëve të Shqipërisë e quajti aktin nëj incident të rëndë dhe sjelljen e efektivëve “arrogancë policore”. Ata bënë thirrje për reflektim urgjent nga ana e autoriteteve policore për raste të tilla.
