Haxhi Murati, kryeplaku i fshatit ‘Nojë’ në Krujë është arrestuar nga policia ndërsa në kërkim është shpallur Bujar Sefa (Xaka). Mbi dy personat rëndojnë akuzat për prodhim lëndësh narkotike dhe armëmbajtje pa leje.
Policia ka zbuluar se kryeplaku dhe personi i shpallur në kërkim kanë përgatitur në banesat e tyre kanabis dhe kanë mbajtur armë pa leje. Gjatë kontrollit janë zbuluar 145 kg lëndë narkotike cannabis sativa, gati për shitje, të vendosura në fuçi ngjyrë blu, si dhe është zbuluar se në banesa ka pasur municione luftarake.
Policia po vijon kërkimet për të gjetur bashkëpuntorin e kryeplakut, i cili është arratisur.
NJOFTIMI:
Finalizohet operacioni policor i koduar “Noja”, për goditjen e veprimtarisë kriminale në fushën e narkotikëve. Operacioni i zhvilluar nga strukturat e DVP Durrës dhe shërbimet e Komisariatit të Policisë Krujë, në bashkëpunim me strukturat e SHÇBA-së. Sekuestrohet një sasi prej 145 kg lëndë narkotike cannabis sativa dhe municion luftarak. Arrestohet në flagrancë kryeplaku i fshatit Nojë, shpallet në kërkim 1 shtetas tjetër. Strukturat e DVP Durrës dhe shërbimet e Komisariatit të Policisë Krujë, në bashkëpunim me strukturat e SHÇBA-së, në vijim të punës për goditjen e aktivitetit kriminal në fushën e prodhimit dhe shitjes së lëndëve narkotike, bazuar në informacionet e siguruara në rrugë policore, mirorganizuan punën dhe finalizuan me sukses operacionin policor të koduar “Noja”, në kuadër të të cilit u arrestua në flagrancë shtetasi:
H. M., 66 vjeç, banues në fshatin Nojë, Krujë, me detyrë kryeplak i fshatit Nojë, për veprat penale “Shpërdorim detyre” dhe “Prodhimi dhe shitja e narkotikëve”.
Gjithashtu u bë shpallja në kërkim e shtetasit B. S.(X)., 34 vjeç, banues në Nojë, Krujë, për veprat penale “Prodhimi dhe shitja e narkotikëve” dhe “Armëmbajtje pa leje”. Shërbimet e Policisë, gjatë kontrollit të ushtruar në banesat e tyre, gjetën dhe sekuestruan në cilësinë e provës materiale një sasi prej 145 kg lëndë narkotike cannabis sativa, gati për shitje, si dhe municion luftarak. Vijon puna për dokumentimin e plotë të kësaj veprimtarie kriminale dhe kapjen e shtetasit të shpallur në kërkim. Materialet i kaluan Prokurorisë së Rrethit Gjyqësor Krujë, për veprime të mëtejshme.
