Një 25-vjeçar i shpallur në kërkim ndërkombëtar është ekstraduar nga Spanja në Shqipëri, në kuadër të operacionit policor të koduar “The Wanted”.
Sorel Cenaj, i kërkuar për tentativë vrasjeje, ishte subjekt i një urdhri arresti të lëshuar nga Gjykata e Kukësit, e cila i kishte caktuar masën e sigurisë “Arrest në burg” për veprat penale “Vrasja me kapërcim të kufijve të mbrojtjes së nevojshme”, mbetur në tentativë, dhe “Prodhimi, mbajtja, blerja apo shitja pa leje e armëve të ftohta”.
Ngjarja për të cilën akuzohet ka ndodhur në vitin 2023, në një lokal në lagjen nr. 5 të Kukësit, ku Cenaj dyshohet se ka tentuar të vrasë një shtetas me inicialet A. E., duke e goditur me mjet prerës.
Interpol Tirana, në bashkëpunim me autoritetet spanjolle, bëri të mundur lokalizimin dhe ekstradimin e tij drejt Shqipërisë, ku do të përballet me drejtësinë.
