Ish-kryetari i Këshillit të PD në Kukës, Abedin Oruçi, i cili ishte shpallur në kërkim para dy muajsh për disa vepra penale, është konfliktuar mesditën e sotme me policinë e si pasojë ka plagosur 5 efektivë të patrullës.
Bëhet me dije se 5 efektivët e policisë në Kukës, janë përballur me Oruçin dhe i kanë kërkuar të dorëzohet, por ky i fundit i ka nxjerrë pistoletën.
5 efektivët e policisë raportohet se kanë mbetur të plagosur, por nuk dihet nëse janë qëlluar me armë nga Oruci.
Në vendin e ngjarjes raportohet se kanë shkuar forca të shumta policie dhe 2 prokurorë të Kukësit. Paraprakisht, bëhet me dije se Oruçi ka kundërshtuar oficerët e Policisë dhe i ka marrë ata përpara me makinë.
Mediat kanë raportuar se 54 vjeçari ka tentuar t’i qëllojë kur ata do ta shoqëronin, por efektivët ia kanë hequr pistoletën nga dora.
Pas këtij momenti, Oruçi i ka marrë ata përpara me makinë, duke i lënë të pestë të plagosur.
Kujtojmë se Abedin Oruçi është shpallur në kërkim më 28 tetor 2020, pasi akuzohet për veprat penale “Kanosje për shkak të detyrës”, “Evazion fiskal” dhe “Ndërtim pa leje”.
Ndër të tjera Oruçi ka qenë kandidat i Bindjes Demokratike për zgjedhjet vendore. Më herët ai ka qenë edhe kreu i këshillit bashkiak të PD-së dhe PDIU-së në Kukës./Gazetareeforma.com/
