Këshilli i Lartë Gjyqësor miratoi sot disa vendime në një mbledhje të zhvilluar online, për plotësimin e kritereve të kandidatëve që garojnë për anëtarë të Gjykatës së Lartë.
Problemi nis, sepse në mesin e kandidatëve është edhe emri i gjyqtares së Apelit, Elona Toro, që kandidon për një post në Gjykatën e Lartë.
Kandidimi i saj pritej, por janë dy problemet që e shoqërojnë figurën e saj.
Si fillim, Elona Toro është ende në procesin e vettingut. Ajo u konfirmua me shumicë votash në shkallën e parë, por anëtarja në KPK që ishte pakicë, ngriti disa pikëpyetje për pasurinë e Toros.
Ajo pret të përballet me Kolegjin e Apelimit në sitën e vettingut. Ndërkohë, problemi i dytë ka të bëjë me bashkëshortin e Elona Toros.
Alban Toro, është anëtar i Këshillit të Lartë Gjyqësor, dhe ky është institucioni që do vendosë për fatin e gjyqtares Elona Toro, nëse do e propozojë për Gjykatën e Lartë.
Nga sa mësohet, Alban Toro nuk ka qenë pjesë e mbledhjes së sditës 17 tetor, dhe nuk do të jetë në vijim kur të shqyrtohet kandidatura e bashkëshortes së tij.
Por, është e menjëherëshme pyetja që ngrihet, largimi i tij a e shmang ndikimin mbi anëtarët e tjerë të qeverisë së gjyqësorit?
Lidhjet familjare dhe nepotizmi në sistemin gjyqësor ishin një nga problemet që pritej të zgjidhej me Reformën në Drejtësi, por ende po vijojnë të mbijnë skandale të tilla, madje edhe në rangjet më të larta të gjykatave.
/GazetaReforma.com/
