Një 45 vjeçar nga Elbasani është plagosur nga Forcat Speciale RENEA dhe më pas është arrestuar në mes të një pylli. Personi i quajtur Josif Kavaja qëllonte vazhdimisht me një automatik kallashnikov. Policia shpërndau një komunikatë zyrtare dhe sqaron se në orët e para të mëngjesit të sotëm, ky njeri ka hapur zjarr ndaj tyre.
“Grupi negociator i Reneas i ka bërë thirrje për disa orë rresht shtetasit J.K., për t’u dorëzuar, por ky shtetas nuk i është bindur thirrjeve të Policisë”, deklaron policia.
Njoftim i Policisë Elbasan
Në vijim të informacionit të dhënë për sulmin me armë nga shtetasi J.K ndaj forcave të Drejtorisë Vendore të Policisë Elbasan që kishin shkuar nē fshatin Selte, Elbasan, për kontroll banese me vendim Gjykate, në banesën e shtetasit J.K., pasi dyshohej se dispononte armë zjarri pa leje, ju informojmë se:
Policia Vendore e Elbasanit rrethoi zonën në një perimetër të gjerë dhe në ndihmë të Policisë Vendore shkuan forcat speciale Renea.
Grupi negociator i Reneas i ka bërë thirrje për disa orë rresht shtetasit J.K., për t’u dorëzuar, por ky shtetas nuk i është bindur thirrjeve të Policisë.
Shtetasi J.K, në orët e para të mëngjesit ka qëlluar me armë në drejtim të forcave Renea dhe gjatë shkëmbimit të zjarrit ky shtetas ka mbetur i plagosur jashtë rrezikut për jetën.
Në vendngjarje janë gjetur një armë zjarri pushkë dhe një sopatë.
Grupi hetimor nën drejtimin e Prokurorisë së Rrethit Gjyqësor Elbasan, vijon punën për dokumentimin e plotë të ngjarjes.
Forcat Speciale RENEA janë detyruar mbrëmjen e djeshme që pas 6 orësh tentativa për të bindur 45 vjeçarin Josif Kavaja të dorëzohet, të ndërpresin operacionin.
Ngjarja
Pak para mesnatës, RENEA kishte rrethuar gjithë fshatin Zavalinë dhe po mbante nën monitorim 45 vjeçarin, por i kishte pezulluar tentativat për të bërë të mundur dorëzimin e tij, për shkak të errësirës dhe terrenit të vështirë.
Ky vendim është marrë dhe për të mos vënë në rrezik efektivët e repartit të Forcave Speciale pasi Josif Kavaja ëishte i armatosur dhe herë pas here ka hapur zjarr në drejtim të tyre. Ndërkohë, mëngjesin e sotëm operacioni ka nisur sërish dhe pjesë e tentativave për të bindur 45 vjeçarin të dorëzohet, janë bërë dhe familjarët e tij.
Dy snajperë të RENEAS ishin pozicionuar në dy pika të ndryshme në zonën e pyllëzuar dhe ishin në gatishmëri.
Nga plumbat e tyre është plagosur njeriu i armatosur që nuk pranonte të dorëzonte armët.
/Gazetareforma.com/
