Gjykata e Apelit e Juridiksionit të Përgjithshëm ka lënë në fuqi masën e sigurisë “arrest me burg” për ish-drejtorin e “Bankers Petroleum”, Leonidha Çobo, dhe drejtorin aktual, shtetasin kinez Hongping Xiao. Seanca u zhvillua më 6 gusht, ku ishte i pranishëm edhe përfaqësuesi i ambasadës kineze në Tiranë.
Të dy personat kishin kundërshtuar masat e sigurisë të vendosura më parë nga Gjykata e Fierit, por Apeli rrëzoi kërkesat e tyre, duke mbështetur qëndrimin e Prokurorisë.
Ndërkohë, për disa zyrtarë të tjerë të përfshirë në hetime, Gjykata e Apelit zbuti masat e sigurisë. Nga pesë masat “arrest shtëpie”, vetëm njëra u ndryshua në “detyrim paraqitjeje”, për shkak të rrethanave familjare, pasi një prej të dyshuarve është prind i një fëmije 2-vjeçar.
Ndërsa për tre persona të tjerë u hoq masa e ndalimit të daljes jashtë vendit, duke lënë në fuqi vetëm detyrimin për t’u paraqitur në polici gjyqësore.
Në total, dhjetë zyrtarë dhe ish-zyrtarë të kompanisë ndodhen nën hetim për një sërë veprash penale të rënda, që lidhen me një skemë të dyshuar mashtrimi financiar, e cila ka dëmtuar rëndë buxhetin e shtetit shqiptar.
Sipas Prokurorisë, të pandehurit kanë krijuar një strukturë të sofistikuar për shmangien e detyrimeve tatimore, duke përfituar miliona euro në mënyrë të paligjshme. Fitimet e padeklaruara dyshohet se janë pastruar më pas përmes mekanizmave të pastrimit të parave.
Përveç Leonidha Çobos dhe Hongping Xiaos, masa “arrest shtëpie” iu caktua punonjësve Lianyi Uang, Ardit Kero, Flavia Capo dhe Kledi Xhani. Masa “detyrim paraqitjeje” iu vendos Majlinda Thanës, Matilda Ibraliut dhe Erton Ademajt, ndërsa masa e arrestit në shtëpi u zëvendësua me detyrim paraqitjeje për Doina Gogan, për shkak të rrethanave familjare.
Seanca u zhvillua me dyer të mbyllura, ndërkohë që në sallë ishin edhe përfaqësues të kompanisë dhe të ambasadës kineze, të cilët nuk morën pjesë në diskutimet.
Hetimet për këtë rast nisën më 30 dhjetor 2024 dhe gjatë disa muajve Prokuroria, në bashkëpunim me Inspektoratin e Tatimeve, ka mbledhur prova që krijojnë dyshimin e arsyeshëm për kryerjen e veprave penale.
Sipas hetimeve, kompania “Bankers Petroleum Albania Ltd” ka shfaqur humbje fiktive për periudhën 2004-2024, duke shmangur pagesën e tatimeve mbi fitimin, pavarësisht se ka kryer eksport dhe shitje brenda vendit në vlerën mbi 532 miliardë lekë.
Gjithashtu, dyshohet se kompania ka përfituar në mënyrë mashtruese rimbursime të TVSH-së, me ndihmën e individëve dhe kompanive kontraktuese. Hetimet vazhdojnë, pasi dyshohet për implikim të disa skemave të ndryshme mashtrimi për TVSH-në dhe pastrim parash, ku mendohet të jenë të përfshirë edhe persona dhe kompani të tjera.
Në kërkim ndodhen edhe katër persona të tjerë të përfshirë në këtë çështje.
