Pak momente më parë Ministria e Shëndetësisë njoftoi se numri i të prekurve ka koronavirusi ka shkuar në 33.
Ministria e Shëndetësisë bëri me dije se janë kryer 159 testime të reja nga 457 në total.
Mësohet se njëri prej të infektuarve është një mjek i spitalit të Durrësit, i cili i shërbeu 73-vjeçares që ndërroi jetë.
Pas testimeve të para të bërë në Durrës për 50 mjekë, Ministria e Shëndetësisë njofton, se ka nisur punën për gjurmimin e kontakteve dhe marrjen e mostrave të reja në spitalin e Durrësit.
Bazuar në rezultatet e fundit të dala nga kampioni i dytë i mostrave të 39 mjekëve, infermierëve dhe pacientëve, rezulton pozitiv vetëm një mjek.
Në spitalin e Durrësit gjithsej janë kryer 89 testime.
Për të parandaluar përhapjen e koronavirusit, qeveria ka vendosur një sërë masash shtrënguese si mbyllja e lokaleve, shkollave, anulimi i tubimeve, mbyllja e call center-ave dhe fasonerive.
Gjithashtu në rrugë ka zbritur ushtria dhe policia, të cilat po kontrollojnë zbatimin e rregullave të karantinës.
Njëkohësisht me urdhër qeverie, është ndërprerë qarkullimi i makinave private deri të dielën në mesnatë.
