Gjykata e Durrësi ka caktuar masën e sigurisë “arrest me burg” për pronarin e gomisterisë në Durrës, ku humbi jetën një i ri vetëm 20 vjeç. Ngjarja e rëndë ndodhi në datën 6 korrik në zonën e Kënetës, ku Rafael Talaj punonte. Në momentin që ka qenë duke fryrë gomën e një kamioni ajo ka shpërthyer duke i marrë tragjikisht jetën.
Pronari i subjektit në fjalë, Xhemal Duka akuzohet për “Shkelja e rregullave të mbrojtjes në punë”.
“Më datë 06.07.2021, rreth orës 08:50, në lagjen nr.14/1, Kënetë, në ambientet e një gomisterie, duke rregulluar një gomë të një kamioni e cila ka shpërthyer, është lënduar shtetasi R. T., 20 vjeç, (punonjës), i cili si pasojë e plagëve të mara ka ndërruar jetë. Grupi hetimor ndodhet në vendngjarje dhe po punon për zbardhjen e rrethanave të ngjarjes”, njoftonte policia disa ditë më parë për ngjarjen në fjalë.
Dëshmitarët e ngjarjes thanë se i riu punonte në gomisteri dhe e quajtën atë një shembull të shkëlqyer. Ata bënë me dije se menjëherë pasi dëgjuan një shpërthim njoftuan policinë dhe ambulancën, por kjo e fundit erdhi me vonesë duke pamundësuar që i riu të merrte ndihmën e shpejtë që herët. Pak pas ambulancës mbërriti në vendngjarje edhe policia.
