Në seancën e sotme plenare në Kuvend Deputeti i PD, Edmond Spaho është përjashtuar nga seanca pas fjalës së tij e cila ngjalli “acarim” në anën e socialistëve të cilët i quajti “bastardë”.
Ermonela Felaj kërkoi që Spaho të kërkonte falje për fjalën e thënë dhe më tej tha se ky i fundit nuk e meritonte të ishte pjesë e seancës në Kuvend.
Përveç përjashtimit nga seanca, ndaj tij u mor edhe një masë tjetër financiare, e cila përkthehet në mos-marrjen e pagës së një dite.
“Kjo ka zgjidhje vetëm protestat. Nëse do të vijojmë këtu asgjë nuk do të ndryshojë. Nëse në vendet e tjera do bien çmimet pas gjashtë muajve kjo nuk do të ndodhë. Duhet të ngrihemi në protesta e ti rrëzojmë. Këto marrin vesh vetëm me këtë gjuhë. Nuk ka gjuhë tjetër që shkon me këta bastardë”, tha Spaho më herët.
Kujtojmë se pak minuta më parë është ndërprerë seanca plenare në kuvendin e Shqipërisë. Shkak është bërë debati i shkaktuar pas frazës së përdorur nga deputeti demokrat, Edmond Spaho i cili u shpreh “Nuk ka gjuhë tjetër që shkon me këta bastardë”.
Kjo ka sjellë reagimin e kreut të grupit parlamentar të PS-së, Taulant Balla i cili kërkoi që Spaho të përjashtohej nga seanca.
