Detaje të reja janë zbuluar në lidhje me vrasjen e vëllezërve Besmir dhe Viktor Haxhia në Durrës.
Bashkëpunëtori i drejtësisë, Klevis Alla, ka rrëfyer për hetuesit, se Besmir Haxhinë e kanë ekzekutuar për modifikimin e një makine të vjedhur, ndërsa të vëllanë për të mos lënë dëshmitarë.
“Ne jemi një grup që merremi me vjedhje makinash dhe i dërgonim për t’i modifikuar tek servisi i Dorjan Shkozës dhe vëllezërve Haxhia.
Me Besmirin jemi prishur për një konflikt që patëm për një makinë. Besmiri nuk na i dha paratë e një makine siç kishim rënë dakord. I kërkuam paratë por Besmiri nuk na i dha.
Me Viktorin nuk kemi patur probleme, por qëlluam për të mos lënë dëshmitarë”, ka deklaruar Klevis Alla para policisë.
Mbështetur edhe nga dëshmia e të riut, hetuesit kanë zbuluar se shkak për ekzekutimet në 2 muajt e fundit janë bërë 5 milion eurot e grabitura në Rinas.
Sipas Allës, vëllezërit Haxhia kanë strehuar në banesë një nga grabitësit e Rinasit.
Më tej ai shton se vrasjet e kryera deri më tani janë porositur nga i njëjti grup kriminal, që kërkon pjesën nga paratë, të cilat janë investuar dhe po kërkohen.
“Dy vëllezërit Haxhia strehuan në banesë një nga grabitësit e Rinasit. Unë kam marrë pjesë në të paktën 4 ngjarje kriminale. Paratë e Rinasit diku janë investuar dhe po kërkohen”, mësohet të ketë thënë ai.
I riu ka thënë gjithashtu se grupi kriminal që ka porositur dy atentatet ka qenë pjesëmarrës edhe në katër ngjarje të tjera kriminale brenda vendit.
Kujtojmë këtu se të shtunën Gjykata e Durrësit dha masën e sigurisë “Arrest me burg” për Klevis Allën dhe Altin Ndocin, të cilët akuzohet për vrasjen e vëllezërve Haxhia, Dorian Shkozës dhe Anxhelo Avdisë.
