Deputeti demokrat, Asllan Dogjani, ka dalë nga ambientet e Gjykatës së Posaçme, ku u zhvillua seanca paraprake ndaj tij, pas akuzave nga SPAK për fshehje pasurie.
Në një prononcim për gazetarët jashtë GJKKO, Dogjani deklaroi se kërkesat e tij janë pranuar dhe shtoi se gjyqtarja e çështjes do të shpallë vendimin përfundimtar të premten, më 24 janar, në orën 10:00.
Vendimi i gjyqtares Rudina Palloj tregoi se ka gjyqtarë të zotë. Uroj që sistemi i drejtësisë të ketë sa më shumë gjyqtarë si kjo sot, që vendosi pavlefshmëri, papërdorshmëri dhe dha një vendim shumë të drejtë. Ajo vendimin përfundimtar do ta japë të premten, por kërkesat tona u pranuan. Sot dha papërdorshmëri, atë që kishim kërkuar ne dhe do të shprehet për pushimin e çështjes ditën e premte, tha Dogjani.
Deputeti i PD, Asllan Dogjani, akuzohet për fshehje pasurie, pasi Prokuroria e Posaçme Kundër Korrupsionit dhe Krimit të Organizuar përfundoi hetimet dhe e dërgoi çështjen për gjykim në Gjykatën e Posaçme të Shkallës së Parë.
Sipas njoftimit zyrtar, Dogjani akuzohet për deklarim të rremë të pasurisë, në lidhje me një apartament që ai ka përfituar.
