Një ngjarje e rëndë ka ndodhur ditën e sotme në Shkodër. Një emigrant shqiptar ka qëlluar me armë pronarin e një lavazhi.
38-vjeçari kishte disa ditë që kishte ardhur nga Italia në Shkodër, ku pas një konflikti për motive të dobëta ka qëlluar me armë në drejtim të shtetasit Klodian Rroku.
Policia u vu në ndjekje të autorit të ngjarjes Luan Lugaj, derisa kanë bërë të mundur arrestimin e tij.
Lugaj e ka hedhur armën e krimit në lumin Buna. Ende nuk dihet edhe gjendja shëndetësore e të plagosurit.
Njoftimi i policisë:
Nga strukturat e Policisë së Shkodrës, falë reagimit të shpejtë, u arrestua në flagrancë shtetasi: L.L., 38 vjeç, banues në fshatin Shtoj i Vjetër, Shkodër.
Shtetasi L.L., pas një konflikti për motive të dobëta, në lagjen ‘Skënderbeg’, dyshohet se ka qëlluar me armë zjarri në drejtim të shtetasit K.Rr., i cili ka qenë duke punuar në autolavazhin e tij. Personi i arrestuar dyshohet se armën që ka përdorur e ka hedhur në lumin Buna gjatë ndjekjes nga Policia, ku vijon puna për gjetjen e saj.
Në bashkëpunim me Prokurorinë vijojnë hetimet për zbardhjen e plotë të kësaj ngjarjeje”, bën të ditur Policia, ndërkohë që ndaj 38-vjeçarit të arrestuar janë ngritur akuzat “Vrasja me dashje, mbetur në tentativë” dhe “Prodhimi dhe mbajtja pa leje e armve luftarake dhe e municionit”.
Nga hetimet e para dyshohet se konflikti mes Luan Lugajt dhe Klodian Rrokut ka nisur pasi emigranti kishte lënë makinën për larje, por pasi është larguar 38-vjeçari ka konstatuar se në automjet i mungonte diçka.
Kjo gjë është bërë shkak që mes dy personave të lindë konflikti, i cili për pak përfundoi me pasoja të rënda.
