Një tragjedi e dyfishtë ka goditur qytetin e Peqinit në orët e para të mëngjesit të së dielës, ku dy të rinj, Gabriel Lluca dhe Denis Korbi, të dy 24-vjeçarë, humbën jetën në një aksident të rëndë rrugor.
Ngjarja ndodhi rreth orës 02:00 të mëngjesit në zonën e njohur si “Ura e Teqes”, në hyrje të qytetit. Automjeti tip “Volkswagen Golf”, me të cilin udhëtonin të rinjtë, doli nga rruga dhe u përplas me shkallët e një shtëpie, duke rezultuar fatale për të dy pasagjerët. Të rinjtë u transportuan me urgjencë drejt Spitalit Rajonal të Elbasanit, por nuk arritën t’u mbijetojnë plagëve të marra.
Policia ka nisur hetimet për zbardhjen e plotë të rrethanave të aksidentit, ndërsa dyshohet se shkak i daljes nga rruga ka qenë shpejtësia e lartë.
Historia e Gabriel Llucës ka prekur zemrat e qytetarëve. Ai ishte vetëm 8 vjeç kur i mbijetoi një aksidenti të rëndë pranë shkollës “Demir Godelli”, fare pranë banesës së familjes së tij. Në atë ngjarje, një automjet i kishte kaluar sipër trupit, duke i shkaktuar plagë të rënda dhe fraktura të shumta. Falë një kurajo të jashtëzakonshme dhe trajtimit mjekësor, ai arriti të shpëtonte, duke u kthyer në simbol mbijetese për shumë qytetarë.
Por fatkeqësisht, 16 vite më vonë, në të njëjtin qytet ku dikur i kishte shpëtuar vdekjes, Gabriel Lluca humbi jetën në mënyrë tragjike. Ai ishte një nga katër fëmijët e familjes Lluca, e cila vetëm tre vite më parë përjetoi një tjetër dhimbje të madhe: ndarjen nga jeta të kryefamiljarit Agron Lluca.
Lajmi për humbjen e dy të rinjve ka tronditur familjet, miqtë dhe bashkëmoshatarët e tyre. Gabriel kujtohet si një djalë energjik, i dashur dhe gjithmonë me buzëqeshje në fytyrë. Të dy të rinjtë linin pas shumë ëndrra të pambaruara dhe një boshllëk të thellë.
