Prej kur ka nisur procesi i Vetting-ut dhe verifikimit të pasurisë për prokurorët e gjyqtarët, nuk kishte ndodhur që ndonjë prej tyre të pritej me proteste. Por kjo gjë ndodhi ditën e djeshme, pikërisht ndaj gjyqtarit Bari Shyti. Teksa hynte në Pallatin e Kongreseve, ku ndodhet Komisioni i Pavarur i Kualifikimit, Shyti është përballur me një grup qytetarësh me pankarta në duar që lexonin “Gjyqtari i korruptuar, me pasuri marramendëse të padeklaruara, lokale, miniera…” apo “KQK zvarrit procesin, nuk verifikon arsimin e veterinerit Bari Shyti”.
Dhe siç e kishin konstatuar edhe qytetarët, verifikimi i Pasurisë së Bari Shytit nuk doli pa probleme. Në raportin e tij KPK ka hasur probleme në lidhje me burimin e të ardhurave për blerjen e dy apartamenteve në Durrës e në Tiranë. Fillimisht Shyti i ka blerë apartamentet përgjysmë me të vëllain, Ismail Shyti, por më pas ato kanë kaluar në pronësi të plotë të gjyqtarit. Shyti ka bërë deklarime kontradiktore lidhur me pagesat ndaj të vëllai për apartamentin në Durrës. Po ashtu ka pasur problematika edhe në blerjen e apartamentit në Tiranë, i cili është shlyr në 4 këste. Po ashtu në skedën e pasurisë të publikuar nga BIRN, gjyqtari rezulton me flamuj të kuq për sa i përket deklarimit të pasurisë.
Bëhet fjalë për një shumë prej 21 mijë dollarësh që Shyti i ka fituar nga shitja e 60 ton krom nga kompania “Erim SHPK” e vëllait të tij. KPK ka thënë se kjo shumë e fituar në vitin 2008 është deklaruar si burim të ardhurash vetëm gjatë vettingut pasi për to nuk janë paguar detyrime tatimore.
Në dokumente rezulton se firma “ERIM SH.P.K”, zotëron leje minerare për shfrytëzimin e kromit në galeritë nr.3, 4 dhe 7, vendburime këto që ndodhen në zonën e Kodër Lerë në Bulqizë.
Emri i gjyqtarit nuk del në asnjë letër si pronar i kësaj kompanie, por në një deklarim të pasurisë për vitin 2008 ai ka pranuar se ka përfituar 21.000 dollarë nga mbledhja dhe shitja e 60 ton mineral krom në periudhën maj – qershor 2008 në stokun e kompanisë “ERIM”…”-.
Veç këtyre ka të dhëna se Shyti është aksioner në ndërtimin e hidrocentralit “HEC Shytaj” në Bulqizë. Këto dyshime vijnë pasi kompania e zotëruar nga vëllai i tij, “ERIM Sh.p.k” është bashkëaksionere në ndërtimin e HEC-it së bashku me “ARKEV SH.P.K” dhe “ÇUPI GROUP SH.P.K”.
Bari Shyti e ka nisur karrierën në sistemin e drejtësisë në vitin 1993 dhe ka punuar si gjyqtar në Gjykatat e Bulqizës dhe atë të Dibrës. Në vitin 2013, ai u dekretua si gjyqtar në Gjykatën Administrative të Durrësit dhe prej vitit 2016 e ushtron funksionin në Gjykatën Administrative të Apelit.
Por emri i Bari Shytit nuk është i njohur vetëm për pasuritë marramendëse. Në 24 dhjetor të vitit 2018 ai rrëzoi kërkesën e shoqërisë civile dhe la në fuqi tarifat e reja të ujit të pijshëm të vendosura nga kryebashkiaku Erion Veliaj.
Nga ana tjetër, seanca për verifikimin e pasurisë së gjyqatrit ishte lajmëruar për në datën 19 mars, megjithatë për arsye të paditura ajo u shty për të martën e 23 marsit.
