Sot është hequr përfundmimisht imuniteti i Sali Berishës, duke i hapur rrugë arrestimit të tij të kërkuar më parë edhe nga SPAK për çështjen Partizani.
I gjithë procesi është zhvilluar në kushte të pazakonta, pasi edhe jashtë Kuendit por edhe brenda po protestohej nga opozita. Kujtojmë se edhe sot në sallë janë hedhur tymuese dhe karriget janë vendosur përmbys.
Gjatë seancës së shkurtër, ishte kryeparlamentarja Lindita Nikolla ajo e cila ka lexuar rregulloren dhe ka ftuar Berishën për të marrë fjalën, por ky i fundit e refuzoi.
Kujtojmë se dje Gjykata Kushtetuese rrëzoi kërkesën e 30 deputetëve të opozitës për të cilësuar antikushtetuese masat ndaj Berishës, ndërsa ajo ia kaloi procedurën e radhës Kuvendit.
Sakaq, dje ish-kryeministri Sali Berisha iu bëri thirrje qytetarëve që të jenë pjesë e protestës së opozitës. Po ashtu ai paralajmëroi protesta edhe përpara SPAK, institucion, i cili sipas tij po amniston Ramën dhe Veliajn për aferën me inceneratorin e Tiranës.
