Në Spitalin Infektiv ka ndërruar jetë ditën e sotme një pacient 75-vjeçar, duke e çuar në 17 numrin e viktimave në total në vendin tonë bën me dije Ministria e Shëndetësisë.
Viktima ka mbërritur në spital në gjendje të rëndë, teksa bëhet me dije se vuante nga post-hemorragjia cerebrale, diabeti dhe hipertensioni.
Shtetasi me inicialet A.C., ishte testuar dhe kishte rezultuar pozitiv me COVID-19, ndërkohë që gjendja e tij shëndetësore është rënduar në mënyrë të menjëhershme dhe pavarësisht përpjekjeve të mjekëve të Spitalit Infektiv për ta asistuar në kohë rekord, pacienti nuk ia ka dalë të mbijetojë.
Sakaq, ka shkuar në 304 numri i të prekurve nga COVID-19 në vendin tonë, pasi në 24 orët e fundit janë shënuar 27 raste të reja.
Në total deri më tani janë kryer 2,031 teste, ndërsa një lajm i mirë është shërimi i 13 pacientëve të tjerë, duke e çuar në 89 numrin e të shëruarve nga fillimi i epidemisë e deri tani në vendin tonë.
Në spitalin Infektiv ndërkohë ndodhen 73 persona, 7 prej të cilëve në terapi intensive, ku dy janë intubuar dhe në spitalin COVID2, “Shefqet Ndroqi”, ndodhen 4 pacientë, dy prej të cilëve janë intubuar.
Sakaq në Shkodër numri i të prekurve është dyfishuar dhe bëhet fjalë për dy familje, për të cilat ka nisur hetimi epidemiologjik.
