Gjykata e Lartë ka vendosur të mos pranojë rekursin e paraqitur nga ish-efektivi i policisë Jeton Lami, duke lënë në fuqi vendimin e mëparshëm për dënimin e tij me 2 vite e 10 muaj burg. Vendimi i formës së prerë i jep fund përpjekjeve ligjore të Lamit për të kundërshtuar dënimin.
Jeton Lami u dënua fillimisht nga Gjykata e Lezhës, pasi u kap në shoqërinë e Ervis Martinajt, pak kohë para se ky i fundit të zhdukej në mënyrë misterioze në gusht të vitit 2022.
Vendimi i gjykatës së shkallës së parë u konfirmua më pas edhe nga Apeli i Juridiksionit të Përgjithshëm, ndërsa Lami kërkoi rishqyrtimin e çështjes në Gjykatën e Lartë, që sot vendosi ta rrëzojë përfundimisht ankimimin.
Ervis Martinaj, i njohur si “mbreti i lojërave të fatit”, ishte shpallur në kërkim ndërkombëtar në kohën e zhdukjes së tij. Ai u akuzua nga Nuredin Dumani se kishte porositur vrasjen e rivalit të tij, Endrit Dokles, duke ofruar për këtë një shumë prej 500 mijë eurosh.
Zhdukja e Martinajt mbetet një nga misteret më të mëdha të viteve të fundit në Shqipëri, me dyshime të shumta për një eliminim mafioz.
Ndërkohë, bashkëpunëtorët e tij të ngushtë, si Jeton Lami, janë vënë përballë drejtësisë, ndërsa hetimet për fatin e Martinajt vijojnë pa një përfundim të qartë.
