Flluska e “OFL”-së e prezantuar qa me bujë nga kryeministri Rama, ka nisur të shfryhet ngadalë dhe në Durrës, kjo është kthyer në një “bumerang” për qeverinë që premtonte se do të “shkatërronte” të fortët edhe ekonominë e tyre.
Lulzim Berisha i konsideruar si një prej “të fortëve” të Durrësit, është shembulli më i qartë se “Operacioni Forca e Ligjit” ishte vetëm një “shashkë” e radhës e qeverisë “Rama”, sa për të treguar se po punohet. ]
Berishës pas lirimit me kusht nga burgu, jo vetëm që kanë nisur t’i rikthehen nga gjykata njëra pas tjetrës pasuritë e sekuestruara nga OFL-ja, por kohët e fundit ai po tregon se shteti nuk ka asnjë forcë ndaj tij.
Këto ditë me vendim gjykate atij i është rikthyer edhe sasia e naftës së sekuestruar disa muaj më parë nga OFL-ja, bëjnë me dije mediat.
Sipas informacioneve tashmë publike, Prokuroria e Durrësit, e cila përfaqësohet në këtë çështje nga Pali Decolli, ka kërkuar heqjen e sekuestros për 1 milion e 200 mijë litrat e naftës.
Pak kohë më parë Gjykata Administrative e Shkallës së Parë në Tiranë i riktheu Berishës licencën për kompaninë hidrokarbure, duke i dhënë të drejtën që ai të rinisë aktivitetin e tij.
Më herët Berisha kishte marrë prej gjykatës edhe makinën e blinduar tip “BMË”, si dhe licencën e shoqërisë “Rajan 2007”, përfshirë të gjitha të drejtat për të tregtuar dhe vazhduar biznesin në hidrokarbure.
Në maj të këtij viti, OFL sekuestroi 1.2 milionë litra naftë dhe një magazinë doganore në Durrës, pikërisht në pronësi të Lulzim Berishës dhe Enkelejda Shoshit.
“OFL” arsyetoi asokohe se, subjekti “Rajan 2007” në pronësi të tyre, pavarësisht se i ishte hequr licenca më datë 13.02.2019, 9 ditë pasi ish-anëtarit të bandës së Durrësit i’u dërgua kërkesa për justifikimin e pasurisë, vijoi punën normalisht për furnizimin me karburant të anijeve të peshkimit në porte në mënyrë të paligjshme.
Sipas argumenteve të OFL-së, i forti i Durrësit, Berisha, përdorte shantazhin ndaj konkurrencës dhe peshkatarëve duke tentuar të krijojë një monopol kërcënues për operatorët e industrisë së peshkimit.
Lul Berisha, një nga emrat më të përfolur të botës shqiptare të krimit, u lirua me kusht nga Gjykata e Apelit të Durrësit. I cilësuar si ish-kreu i “Bandës së Durrësit”, ai rifitoi lirinë, pasi sipas avokatit mbrojtës, ai vuante nga një sëmundje e rëndë.
Berisha u ndalua në vitin 2006 në Maqedoni dhe ndaj tij kanë rënduar akuzat për disa vrasje gjatë viteve 1998-2000.
/GazetaReforma.com/
