I dërguari i Bashkimit Evropian për dialogun mes Kosovës dhe Serbisë, Peter Sorensen, do të qëndrojë në Prishtinë më 6 gusht. Vizita e tij nisi me një takim me presidenten e Kosovës, Vjosa Osmani.
Më pas, Sorensen do të zhvillojë një takim me kryeministrin në detyrë, Albin Kurti, i cili është planifikuar të mbahet në orën 11:00, siç raporton Radio Evropa e Lirë.
Kjo vizitë vjen në një moment të tensionuar në marrëdhëniet ndërmjet dy vendeve, pasi Serbia ka paralajmëruar se nuk do të vazhdojë dialogun për normalizimin e raporteve pa lirimin e një zyrtari të Zyrës për Kosovën në Qeverinë serbe.
Ky zyrtar, Igor Popoviq, u ndalua në Kosovë më 18 korrik dhe ndaj tij është ngritur aktakuzë nga Prokuroria Speciale për “nxitje të përçarjes dhe mosdurimit”, pasi gjatë një fjalimi në Rahovec e cilësoi Ushtrinë Çlirimtare të Kosovës si “organizatë terroriste”.
Raundi i fundit i dialogut të ndërmjetësuar nga Bashkimi Evropian u mbajt më 10 qershor. Pas atij takimi, Peter Sorensen njoftoi se po përgatiteshin kushtet për një takim të nivelit të lartë mes palëve.
