Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm në Elbasan, janë konfiskuar 14 pasuri të shtetasit M.A., i dënuar më parë nga drejtësia italiane për veprimtari kriminale në fushën e shfrytëzimit të prostitucionit.
Prokuroria bën me dije se ndaj tij është zhvilluar një proces penal që nisi në vitin 2017, pas dënimit me vendim të formës së prerë në Torino, ku u provua se kishte përfituar të ardhura të konsiderueshme nga shfrytëzimi i prostitucionit.
Sipas të dhënave të siguruara përmes letërporosive nga autoritetet italiane, M.A. ka përfituar këto të ardhura në mënyrë të paligjshme dhe më pas ka tentuar t’i justifikojë ato përmes investimeve në pasuri të luajtshme dhe të paluajtshme në Shqipëri.
Hetimet në Shqipëri zbuluan një sërë transaksionesh të dyshimta financiare, të kryera nga persona që ushtronin prostitucion në drejtim të llogarive të M.A.-së apo të afërmve të tij.
Të ardhurat, sipas Prokurorisë, janë pastruar nëpërmjet investimeve të drejtpërdrejta ose përmes aktivitetit të regjistruar si person fizik në fushën e tregtimit dhe dhënies me qira të automjeteve, me qëllim fshehjen e origjinës së paligjshme.
Pasuritë e sekuestruara përfshijnë:
• Një apartament në Durrës
• Një aktivitet tregtar për shitje dhe qira automjetesh në Elbasan
• 11 automjete të markave të ndryshme (Mercedes Benz, Maserati, BMW, Audi SQ7, Volkswagen, Suzuki Grand Vitara, Fiat Marea, Jeep)
• Një motomjet BMW
Prokuroria nënvizon se këto pasuri rezultojnë të jenë blerë dhe rivlerësuar përmes një sërë transaksionesh të përsëritura, me qëllim legjitimimin e të ardhurave të paligjshme dhe fshehjen e burimit të tyre.
