Safet Bajri ka mbërritur në ambientet e Policisë së Tiranës, pasi fillimisht u shoqërua në Policinë e Shkodrës me urdhër të SPAK.
Ky zhvillim vjen tre ditë pas një operacioni të forcave speciale RENEA, të cilat zbarkuan në banesën e tij në Dobraç për të kryer kontrolle. Bajri u shoqërua pa bërë asnjë rezistencë.
Sipas avokatëve të tij, Safet Bajri ishte ftuar në orën 11:00 për të dhënë deklarime, por pas mbërritjes në Policinë e Shkodrës, u njoftua se do të merrej në pyetje në Tiranë.
Mbrojtja nuk ka marrë asnjë konfirmim zyrtar për një urdhër arresti, por pohon se për herë të dytë është kërkuar marrja e ADN-së së tij.
Shoqërimi i Bajrit lidhet me hetimet e SPAK, të cilat përfshijnë edhe arrestimin e Samuel Troshanit dhe Izmir Sakicës, të dyshuar si pjesëtarë të grupit të Bajrit. Këta të fundit janë arrestuar me masën “arrest me burg” në kuadër të hetimeve për përplasjen me armë të ndodhur më 23 gusht 2024 në Rranxë të Bushatit, ku u qëllua një automjet i blinduar “Audi A8” me të cilin udhëtonin dy të rinj.
